جوار موسم گرما کی اناج کی فصل ہے جو خشک موسم اور ہلکی زرخیز زمینوں پر کامیابی سے اگائی جا سکتی ہے۔ یہ گرمی اور خشک سالی کی حالت کو برداشت کر سکتی ہے اس لیے اسے بارش اور آبپاشی والی دونوں جگہوں پر کاشت کیا جا سکتا ہے۔ اب لوگ گندم کو انسانی خوراک کے طور پر زیادہ پسند کرتے ہیں۔ اس لیے پچھلے 60 سالوں میں جوار کی پیداوار میں کمی آئی ہے۔ چونکہ جوار کو فیڈ اور چارے کے ذریعہ کے طور پر بھی استعمال کیا جاتا ہے۔ اس لیے پولٹری کے شعبے میں اس کی بہت اہمیت ہے۔
پاکستان میں جوار اور باجرے کا رقبہ اوسطاً 1.5 ملین ہیکٹر ہے اور اس کی پیداوار تقریباً 5.4 ٹن فی ہیکٹر ہے۔ پنجاب اور سندھ پاکستان کے سب سے بڑے جوار پیدا کرنے والے صوبے ہیں جو کل رقبہ کا بالترتیب 47 فیصد اور 26 فیصد حصہ ڈالتے ہیں۔ خوراک کے طور پر اس کے کم استعمال کی کی وجہ سے جوار کے زیر کاشت رقبہ میں کمی آئی ہے۔
جوار گرمی اور خشک سالی کا مقابلہ مکئی کے مقابلے میں بہتر طریقے سے کر سکتی ہے۔ اسی لیے دنیا کے نیم خشک علاقوں میں جوار کی کاشت بڑے پیمانے پر کی جاتی ہے۔ پنجاب کے بارانی علاقوں، ڈیرہ غازی خان، میانوالی، جہلم اور راولپنڈی میں جوار کی کاشت اناج کےلیے کی جاتی ہے۔ جبکہ آبپاشی والے علاقوں میں اسے بنیادی طور پر چارے کےلیے اگایا جاتا ہے۔ صوبہ خیبر پختونخوا کے علاقے ڈیرہ اسماعیل خان اور مردان میں اور بلوچستان کے دو علاقوں سبی اور لورالائی میں جوار بہت زیادہ رقبے پر کاشت کی جاتی ہے۔
پنجاب میں چارے کےلیے جوار مارچ سے مئی تک اور اناج کےلیے جون سے جولائی تک کاشت کی جاتی ہے۔ سندھ میں اس کی بوائی چارے اور اناج دونوں کےلیے جون میں کی جاتی ہے۔ یہ عام طور پر صوبہ خیبر پختونخوا میں جون اور جولائی کے دوران اور بلوچستان میں جولائی اور اگست کے دوران اگائی جاتی ہے۔ جوار کی مختلف اقسام دودھ دینے والے جانوروں میں دودھ کی پیداوار بڑھانے کی صلاحیت رکھتی ہیں۔ تمام چاروں میں سے جوار پاکستان میں زیادہ رقبہ پر کاشت کی جاتی ہے۔