کسان وہ شخص ہے جو زراعت میں مصروف ہے، زمین یا فصلیں کاشت کرتا ہے، کھیت میں کام کرتا ہے اور جانور پالتا ہے۔ یہ اصطلاح عام طور پر ان لوگوں پر بھی لاگو ہوتی ہے جو کھیت کی فصلوں، باغات، انگور کے باغات، پولٹری یا مویشیوں کی پرورش کرتے ہیں۔ کسان زراعت اور کاشتکاری کے شعبے میں کام کرتے ہیں سبزیاں، اناج، پھل اگاتے ہیں اور دودھ، انڈے یا گوشت کےلیے جانوروں کی پرورش کرتے ہیں۔ کسان کو انگلش میں فارمر (Farmer) کہتے ہیں۔ کسان کی مشکلات اور مسائل کو حل کرنا موجودہ وقت کی اہم ضرورت ہے۔
کاشتکار اور زمیندار کے درمیان فرق جاننے سے پہلے ان کی تعریفیں جاننا بہت ضروری ہے۔ کاشتکاری کرنے والا ہر شخص کاشتکار کہلاتا ہے اور ہر وہ شخص جس کی اپنی زمین ہو زمیندار کہلاتا ہے۔ اگر زمیندار خود کاشتکاری بھی کرتا ہے تو وہ کاشتکار بھی ہے۔ کسان اور کاشتکار ایک دوسرے کے مترادف الفاظ ہیں۔ ایک کسان زرعی زمین کا مالک ہو سکتا ہے یا دوسروں کی ملکیت والی زمین ٹھیکے پر لے کر بھی کاشتکاری کر سکتا ہے۔ زیادہ تر ترقی یافتہ معیشتوں میں ایک کسان عموماً زمین کا مالک یعنی زمیندار ہوتا ہے۔
ہر سال 16 اکتوبر کو خوراک کا عالمی دن منا کر پوری دنیا میں کسانوں کو خراج تحسین پیش کیا جاتا ہے کیونکہ کسان ہی وہ شخص ہے جو دنیا کو خوراک مہیا کرتا ہے۔ پاکستان کسانوں کا قومی دن ہر سال 18 دسمبر کو مناتا ہے تاکہ یوم کسان کے موقع پر کسان کی اہمیت کو اجاگر کیا جا سکے۔
کسان کا پاکستان کی زراعت میں بڑا اہم کردار ہے۔ گندم، چاول، مکئی سے لے کر کپاس تک اور سبزیوں، پھلوں سے لے کر دالوں تک تمام زرعی اجناس کسان کی مرہون منت ہیں۔ اٹھارہ دسمبر کو "کسان ڈے" یعنی کسان کے دن طور پر منا کر کسانوں کو خراج تحسین پیش کیا جاتا ہے۔ کاشتکاروں کو تمام سبسڈی براہ راست پہنچانے کے لیے حکومت نے کسان کارڈ کا اجراء کیا ہے۔
یہ ایک حقیقت ہے کہ بیسویں صدی کے دوران زراعت کے شعبے میں ہونے والی ترقی کی وجہ سے کسان زیادہ پیداوار دینے والی فصلوں کی اقسام کاشت کرنے، کھادوں کا متناسب استعمال کرنے، جڑی بوٹیوں اور ضرر رساں کیڑوں کو آسانی سے کنٹرول کرنے کے قابل ہو گئے ہیں۔
زراعت کی ترقی اور کاشتکار کی خوشحالی ملکی معیشت کی مضبوطی کی ضامن ہے۔ اگر کسی زرعی ملک کی خوشحالی کا اندازہ لگانا ہو تو اس ملک کے کسان کو دیکھیں اگر اس ملک کا کسان خوشحال ہے اور ترقی کر رہا ہے تو سمجھیں وہ پورا ملک خوشحال ہے اور ترقی کی راہ پر گامزن ہے۔ خوشحال کسان خوشحال پاکستان، سلام کسان سرسبز پاکستان، خوشحال کسان مستحکم پاکستان، کسان کی خوشحالی سے ہے پاکستان کی خوشحالی، کسان کی ترقی سے ہے پاکستان کی ترقی۔