حکومت پنجاب نے گنے کی نئی قیمت 400 روپے فی من مقرر کی ہے اور حکومت سندھ نے گنے کی نئی قیمت 425 روپے فی من مقرر کی ہے۔ پنجاب میں گنے کی کرشنگ 25 نومبر 2023 سے شروع ہو گئی ہے۔ چونکہ پنجاب میں گنے کا ریٹ سندھ میں گنے کے ریٹ سے 25 روپے کم ہے تو خدشہ یہ ظاہر کیا جا رہا کہ پنجاب کے کسان پنجاب میں گنے کی قیمت کم ہونے کی وجہ سے اپنا گنا سندھ میں فروخت کریں گے۔
محکمہ خوراک پنجاب نے گنے کی کرشنگ کا نوٹیفکیشن جاری کردیا ہے جس میں کہا گیا ہے کہ اگر کسی شوگر مل نے 25 نومبر سے گنے کی کرشنگ شروع نہ کی تو اس شوگر مل کو یومیہ 10 لاکھ روپے جرمانہ ہوگا۔ نوٹیفکیشن میں یہ بھی کہا گیا ہے کہ شوگر ملز مالکان نے 15 روز میں کسانوں کو ان کے گنے کی ادائیگی کرنا ہوگی، فی من سیس قیمت 5 روپے ہی برقرار رکھی گئی ہے۔
مارکیٹ ذرائع کے مطابق گنے کی فی من سرکاری قیمت میں 75 روپے کے اضافے کی وجہ سے چینی کی قیمت میں 15 روپے فی کلو کے حساب سے اضافے کا امکان ہے۔ اس کے علاوہ گنے کی کاشت میں 10 فیصد تک کمی کے باعث موجودہ سیزن 2024 کے دوران گنا کی پیداوار میں بھی کمی کا امکان ہے۔ اگر گنے کی فی ایکڑ پیداوار میں کمی ہوئی تو ملکی ضرورت کے مطابق چینی کی پیداوار بھی نہیں ہو سکے گی۔
یاد رہے کہ آئین پاکستان میں اٹھارہویں ترمیم کے بعد زراعت کا محکمہ صوبائی حکومت کو دے دیا گیا۔ اس ترمیم کے بعد سے گندم کی قیمت اور گنے کی قیمت سمیت دیگر زرعی اجناس کی امدادی یا کم سے کم قیمت کا اعلان کرنا صوبائی حکومت کی ذمہ داری ہے۔